Diziplinarteko proiektuak, hezkuntza-erronka gisa, liburu baten kapitulua
“Los proyectos interdisciplinares como reto educativo” izeneko kapitulu honetan, BAMeko irakasleek Lehen Hezkuntzako Graduko ikasleei eskaintzen dieten diziplinarteko esperientzia azaltzen da. Irakasgaia BAMeko Natur Zientzien eta Gizarte Zientzien arloetatik garatzen da, eta, horrez gain, elizbarrutiko Artxibo Historikoaren eta Arte Sakratuaren Museoa kultur erakundeekin elkarlanean garatzen da.
Roberto Pilar, Pedro Marcos, Anabella Barroso eta Raquel Cilla dira bai irakasgaiaren arduradunak, bai kapituluaren egileak. Haien esanetan, irakasgai hau diziplina ezberdinetako profesionalen arteko lankidetzaren emaitza da, eta helburua BAMeko ikasleen diziplinarteko prestakuntza aberastea da.
Irakasgaiaren helburu nagusia da etorkizuneko irakasleei baliabide didaktiko ugarirekin lan egiteko aukera ematea, baita ohikoak ez diren hezkuntza-inguruneetan ere. Ikasleek informazio-iturri anitz erabiltzen dituzte, modu kontziente eta kritikoan, eta lortutako ezagutza hori Lehen Hezkuntzako gelara egokitzen ikasten dute.
BAMeko irakasleek adierazten dutenez, diziplinartekotasuna funtsezkoa da gaur egungo hezkuntzako erronkei aurre egiteko, izan ere, bizi garen mundua konplexua eta anitza da. Diziplinarteko proiektuak diseinatzea eta gauzatzea ez da lan erraza, baina aukera bikaina da berrikuntzarako eta hobekuntzarako, baldin eta ikuspegi integral eta elkarlanera bideratua hartzen bada. Kontzeptuak nahastu gabe —hala nola transdiziplinartasuna edo diziplina-aniztasuna—, diziplinartekotasunak irakaskuntza tradizionaleko metodo eta teoria batzuk gainditu, eta bestelako arlo eta prestakuntza-ibilbideetako irakasleekin lankidetzan aritzeko beharra azpimarratzen du.